Telecom hots’ı̨ dene Hel Yatı ha nųt’a CRTC 2026-47

Gatineau, 2026-03-18

Beghą ɂesorúnı̨ nı̨dhęn de – Denedédłı̨ne bel ɂedırı Tsątsąne benı̨ hųlı̨ k’e Tsamba nı̨t’a ha honı̨dhęn

T’anądé dzı̨ne k’e dene ha hoɂą beghą ɂesórusı̨ nı̨dhęne de: 2026-09-18

[Yatı chu beghą yawústı huto ɂeyı hots’ı̨ ɂerıhłt’ıs núsɂı̨h nı̨dhęn de ɂeją sı]

Yası beghą yatı holı

Ku ɂedırı hots’ı̨ yası yatı thela sı thılé tth’ú dene xa ɂedırı ɂełk’ech’a yatı ɂá: Anishinaabemowin (Ojibway), Dënesųłıné (Chipewyan), Innu-Aimun (Innu Yuɂąne hotená), Michif Begharek’ą, Mikmaq (Mi’kmawi’simk), Tł’ok’ena (paskwâwinîmowin), chu Baffin Yunaghé hotena, Hotena (Qikiqtaaluk nigiani).

Horelyų dene Canada nąne hoɂá naradé t’ok’e nadé sı tsątsąne benı̨ hųlı̨ benaré hųlı̨ hoɂą, bet’oreɂa chu, detılé hel hotıe t’a nezų sı hoɂą chu beyeyatı horelyų ba thela hoɂą t’ok’e naradé chu dzı̨ne dąnełt’u yet’orełɂa ha.

Ku ɂeyı ɂa ɂedırı Tsamba nı̨t’ą Broadband hulyé ha, ɂeyı ɂa ɂeją dene dełtth’ı́ hotıe degharé dene ts’eranı̨ hodorelɂı̨h ɂa t’ą k’olde betł’esı hu, provincial chu territorial k’olde hel ɂeyı t’a hųlı̨le sı ha tsamba nı̨t’ą sı horelyų nąne hoɂa denededłı̨ne naradé tth’ı́ xa Canada honare. Dųhų ts’ęn, ɂedırı Dene deltth’ı k’ı 70 nıdathela sı dene xa ɂedırı Tsamba nı̨t’a hots’ı̨. ku ɂedırı t’a nı̨yałya sı bet’a tsątsąne benı̨ hųlı̨ naraltła chu cell beyeyatı hųlı̨ ha k’asjęnę 320 dene naradé hel chu  56,000 dene kuę ba. Ku ɂedırı t’a nı̨rałya k’ı bet’a ɂeyı tł’ule t’oredhı ha k’asjęnę 630 kilometres hanı̨łtha tulu k’e chu ɂedırı hołé ha k’asjęnę 6,000 kilometres hanı̨łtha tł’ule dałyé t’ok’e dene naradé ts’ęn.

Ku ɂedırı dene ha sehenųt’ą bet’a dene ɂedırı tł’ule dałye t’a Canada nąne hoɂą dene ha nezų sı, Denededłı̨ne t’ok’e naradé ɂałų nı̨dha k’ąɂu yuné sı ɂeyı ląt’e ɂası bets’ı̨le ɂa tsątsąne benı̨ hųlı̨ naraltła k’ı́. Ɂeyı ɂa, ɂeją Dene dełtth’ı́ k’ı́ ɂedırı dałtsı ha dadı sı Denededłı̨ne hobets’ęn ɂeyı ląt’e ɂası nı̨lye ha, Denededłı̨ne bets’ı̨ Denededłı̨ne beba ɂedırı tsamba nı̨t’ą hots’ı̨. Ku ɂedırı ɂası hołé k’ı́ dųhų ɂası hųlı̨lé sı Denededłı̨ne hobeba hoɂąsı nezų halyé ha t’a ɂeyı ląt’e ɂası hedı̨ narałtı t’a t’ok’e naradé sı naré.

Ku ɂedırı yatı bet’a dene ha hel yatı nodhı́ ha, t’ą Dene ɂedırı hel dełtth’ı́ k’ı́ dųhų dene yeghą t’adanı̨dhęn sı hodoreké sı ɂedırı Tsamba Nı̨t’a denededłı̨ne ba tsątsąne benı̨ hųlı̨ benęnę k’e tł’ule dałyé ha.

Ku Dene ɂedırı ghą t’adanı̨dhęn sı hozelɂı̨h sı bet’a hotıe yatı hołe ha ɂedırı nodhı hots’ı̨ bet’a ɂeją Dene dełtth’ı́ sı t’a hozelɂı̨h dałtsı ha ɂeyı yatı t’a Denededłı̨ne hel t’a hedı̨ narałtsı sı hołé ha. Ku ɂeyer ts’ęn, t’ą Dene ɂeją dełtth’ı́ k’I dene he degharé nadayałtı ha t’ok’e naradé sı hel hotıe Denededłı̨ne yatı hılchu ha bet’a ɂası nezų nodhı́ ha.