Edı̨htł’éh nátse met’ah ehłets’ę́ gots’endeh la, CRTC 2025-9 ǫt’e

Ottawa, 16 January 2025

Azhǫ dene gogha gondı ǫt’e: 8622-S93-202008482, 1011-NOC2020-0367, 1011-NOC2022-0147

Yudáá Góhdlı Ndéh ts’ę́ met’ah ehłets’ę́ gots’endeh ch’a kádeɂa

Gondı met’áodéɂá łáot’e nı̨ts’ıdháa

Łı́é dzę nahk’eh amı́ı Canadians zhaa gı̨́lı́ı sı́ı edı̨ met’áh ełets’ę́ gots’endeh ch’a kádeɂa ts’ęhk’eh t’ąą genıɂá,ezhı́ı t’ah ahsı́ı káondıh gogha sáa thelá gha goɂǫ, ahsı́ı káondıh chu détı̨ ghaı́lée gots’ęh sée ahsı́ı káondıh nezų zǫh thelà gha goɂǫ.

Amı́ı Canadians zhaa gı̨́lı́ı sı́ı azhǫ ełets’ę́ gots’endeh gha godęzhıı gots’ęh azhǫ ndéh k’eh gogháts’enda enıdé godı̨ kı́ı dene łǫ nadéh le sı́ı, ahsı́ı káondıh duɂǫ détı̨ dúyé; Yudáá Góhdlıı ndéh ahsı́ı łǫ gots’ęhk’eh at’ı̨ gots’ęh ahsı́ı duɂǫ détı̨ dúyé. Yudáá zhambáa tų́ę́ gondéh gots’ęh eduhndée dene ndéh sı́ı dene kanet’e ełexee náts’edéh ǫt’e gots’ęh Góhdlı Ndéh, Nunavut gots’ęh Yukon gondéh kadéh cho k’eh dene kanet’é ełetah nadéh ǫt’e. Yudáa Góhdlı Ndéh duɂǫ dene ełech’a nagedéh ezhı́ı t’ah zhat’agoelá zǫh t’ah kǫ́tah gots’ę́ ats’et’ı̨. Edı̨ dene ehłech’a nágedéh, ezhı́ı mets’ęhɂǫ gogha gedezhı́ı gots’ęh met’áh ehłets’e gots’endeh ts’ęhk’eh ahsı́ı zhee ts’ę́ eghálagenda chu zhee k’eh eghálagenda gha duɂǫ detı̨.

Edı̨ ahsı́ı káondıh k’endaa mets’ę́ eghálaeda gha enıdé dáondıh me-gondı thelá megháádé Yudáá Góhdlı Ndéh dáondıh t’ah amı́ı kǫ́tah eghálagenda ts’ęhk’eh ahsı́ı kàondıh t’ah gots’ęhk’eh goghágenda gha. Azhǫ t’ah káá dene ǫkı latth’onǫ ɂǫ́ǫ́ sųláı hono gots’ęh dene gonáá, gots’eh̨ amı́ı satsǫ́ ahsı́ı łǫ kenandı́h ts’ęhk’eh eghálagenda-ke azhǫ goxee dágondıh ts’ęhk’eh gogı̨́ndée, káa ǫkı hono ɂǫ́ǫ́ taı get’e sı́ı Whitehorse, Yukon názhaetı ts’ęhk’eh łegehdée. Amı́ı́ gogha eghalaenda sı́ı azhı́ı gondı gots’ęhk’eh edı̨tth’e la:

Yudáá Góhdlı Ndéh satsǫ́ ahsı́ı łǫ kenandı́h duɂǫ détı̨;
Azhǫ Canada Ndéh k’eh gogháts’enda enıdé Yudáá Góhdlı Ndéh sı́ı edı̨ satsǫ́ ahsı́ı łǫ kenandı́h kı́ı dene łǫ káondıh t’ah eghálagenda le;
Satsǫ́ ahsı́ı łǫ kenandı́h ts’ęhk’eh ahsı́ı łolée, gots’ęh ezhı́ı megháádé amı́ı ahsı́ı káondıh gháádé eghálagenda káondıh zhee ts’ęhk’eh ahsı́ı nágendı́h goghá godezhı́ı;
Ezhı́ı mets’ęhk’eh chu azhǫ dene kehlı̨ goxee nezų nı̨gots’ıɂá gha.

Ezhı́ı t’ah edı̨ zhee ts’ęhk’eh edı̨htł’éh nátse nı̨genıdháa la megháádé amı́ı go-ts’ęhk’eh ahsı́ı eghálaenda sı́ı amı́ı goxee nezų agot’ı̨ le, ekúh t’ı̨h zhee ts’ę́ eghálagenda gha.

Ezhı́ı t’ah dáondıh zhee ts’ę́ séegogeléh gha enıdé, łı́é sa saámba danet’é náts’endı sı́ı łat’áa gots’agendı gha, ezhı́ı la meghááde ahsı́ı káondıh dadéhtı̨ sı́ı k’et’ąą ageléh gha. Amı́ı satsǫ́ ahsı́ı łǫ kenandı́h ts’ęhk’eh t’ah gots’agendı̨ sı́ı, azhǫ yudáá Góhdlı Ndéh ezhı́ı ts’ęhk’eh t’ah gots’agendı gha. Ezhı́ı t’ah dúhdzene dáondıh zhee ts’ęhk’eh gondı kagı̨́ɂǫ sı́ı, ezhı́ı megháádé saámba danet’é zhee ts’ęhk’eh séegogeléh gha.

Edı̨ ǫkılı̨́h la, met’áh k’éndah ahsı́ı nezų goghǫ náendıh gots’ęh Yudáá Góhdlı Ndéh k’eh edı̨ satsǫ́ ahsı́ı łǫ kenandı́h ts’ęhk’eh nezų goxee eghálagenda, amı́ı gogha eghálagı̨déh-ke sı́ı edı̨ met’áh gots’endeh ts’ęhk’eh eghálagenda Northwestel Inc. ųzhe sı́ı. (Northwestel), amı́ı ahsı́ı káondıh t’ah gots’agendı sı́ı ededı̨ gha ahsı́ı káondıh kı́ı méh ts’ę́ keąts’ıgo le, ezhı́ı la:

Met’áh godı́ satsǫ́ ahsı́ı łǫ kenandı́h kı́ı ǫhk’ea ǫkı dzę ts’ę́ eghálaenda le enıdé, káa dulé mets’ęhk’eh amı́ı xáádé edegha eghálaeda gogehtsı̨ gots’ęh amı́ı káondıh t’ah eghálagı̨́déh-ke, gogha edętł’éh. Edı̨ gogha edętł’éh la met’áh sáa ededháa go-edı̨tł’éh náts’endıh, ezhı́ı la gedaęnchı ts’ęhk’eh gots’ęh met’áh satsǫ́ ahsı́ı łǫ kenandı́h k’eɂǫ nezų andéh gha.
Dáondıh yudáá Góhdlı Ndéh k’eh satsǫ́ ahsı́ı łǫ kenandı́h dúye met’áh ats’et’ı̨ enıdé, ezhı́ı mets’ęhk’eh łı́é xaye taonét’e zhee ts’ęhk’eh edı̨htł’éh gehtsı̨ gha. Dáondıh mek’ę́ę́ eghálats’enda k’endaa amı́ı gogha eghálagenda ts’ęhk’eh zhee ghǫ guhndı́h gha gots’ęh dáondıh mets’ę́ eghálaeda sı́ı ededı̨ sǫ́ǫ gúlı́ı ageléh gha.

Taı lı̨́h la, Yudáá Góhdlı Ndéh k’eh edı̨ satsǫ́ ahsı́ı łǫ kenandı́h łǫ ch’a kádeɂa gų́lı́ı ǫt’e, ezhı́ı t’ah amı́ı dáondıh zhee k’eh eghálagenda sı́ı Northwestel dáondıh satsǫ́ tł’uh go-kų́ę́ ts’ę́ gedeht’ı̨ sı́ı nezų ageléh gha. Edı̨ goxee eghálagenda la met’áh gonáá amı́ı eghágı̨́déh-ke sı́ı Northwestel dáondıh eghálagenda ezhı́ı la amı́ı kǫ́tah xáádé edegha eghálagenda gogéhtsı̨ gots’ęh amı́ı dene gų́lı́ı goxee eghálagenda sı́ı satsǫ́ ahsı́ı łǫ kenandı́h ts’ęhk’eh t’ah gots’agendı̨ gha. Edı̨ eghálaeda ts’ęhk’eh megháádé godezhı́ı gháılée gots’ęh amı́ı dene k’ǫne gotah aget’ı̨ sı́ı edı̨ met’áh sée goɂǫ nezų t’ah gots’agendı̨ gha.

Nodée ts’ę́ edı̨ azhı́ı t’ah eghálagenda edı̨htł’éh met’áh aságundele ts’enıdhę, ezhı́ı mets’ıhdzáh gháádé dáondıh edı̨htł’éh nátse zhee ts’andı gha sǫ́ǫndı, ezhı́ı la met’áh dene kehlı̨ zhee t’áogedehthı gha. Mets’ęhɂǫ, edı̨ edı̨htł’éh nátse la met’áh:

Sée ehtth’I k’eogeɂá gha gots’ęh zhee ts’ęhk’eh ɂeɂé gehtsı̨ sı́ı azhǫ amı́ı goxee eghálagenda ts’ęhk’eh nezų goɂǫ gha;
Met’áh chu Yudáá Góhdlı Ndéh k’eh dene nagedéh sı́ı duɂǫ nıdháa ehłehch’a náts’edéh gots’ęh ǫhk’ea chu gondı ets’edéh gha godezhı́ı, ezhı́ı t’ah edı̨ megháádé ahsı́ı k’et’ą́ą́ andéh gha;
Megháádé chu kǫ́tah ts’ęh dene kehlı̨ káa dulé zhee ts’ęhk’eh edegha eghálaeda gogehtsı̨ gots’ęh satsǫ́ ahsı́ı łǫ kenandı́h ts’ęhk’eh chu zhee ts’ę́ k’aogedhe, ezhı́ı meghááde chu kǫ́tah ts’ęhk’eh ahsı́ı ts’ę́ eghálagenda sı́ı zhee ts’ę́ k’aogedhę gha gots’ęh edegha kǫ́tah ts’ęhk’eh eghálagenda gha; gots’ęh
megháádé kǫ́tah ts’ęh dene kehłı̨ kıozhı́ı dene ch’a kádeɂá goxee eghálagenda gha, satsǫ́ ahsı́ı łǫ kenandı́h dadéhtı ts’ęhk’eh chu k’et’ą́ą́ andéh gha, gots’ęh amı́ı ahsı́ı káondıh ts’ęhk’eh eghálagı̨́déh-ke łáondıh gots’agendı gha.

Ezhı́ı t’ah ekúh dene saánet’e łegehdé, edı̨ edı̨htł’éh gháádé eghálagenda sı́ı met’áh sée ehtth’I dene kehlı̨ goxee eghálagenda kehogenı́hthe, azhı́ı met’áh thelá la amı́ı azhǫ ełexee eghálagenda sı́ı, edı̨ edı̨htł’éh ts’ęhk’eh egh́álegı̨́déh-ke ededı̨ gha azhǫ ahsı́ı zhee tah nıgenıdháa Ezhı́ı la edúhda Canada gok’ezhı́ı edı̨ satsǫ́ ahsı́ı łǫ kenandı́h ts’ęhk’eh ahsı́ı tah goghágenda gha, ezhı́ı ła godı̨ dene saánet’e łegehdé, gots’ęh amı́ı gotah gedątth’I sı́ı edı̨htł’éh k’eh gháádé gondı gehtsı̨ gha. Ahsı́ı ghágenda gots’ęh dáondıh gots’ę́ łat’adet’ǫ ezhı́ı la megháádé edı̨htł’éh nátse gehtsı̨ gha.

K’endaa dene kehlı̨ gotah agut’ı̨ genıdhe ezhı́ı t’ah edı̨ edı̨htł’éh dáondıh megháádé eghálaeda gots’ęh kı́ı azhǫ ełeht’e ats’ıt’é le gots’ęh dáondıh azhǫ dene kehlı̨ goxee eghálagenda gha, ezhı́ı t’ah edı̨ edı̨htł’éh megháádé eghálaeda azhǫ Dene kehlı̨ thané ahsı́ı ts’ę́ eghálagenda gha séegogı̨́lá. Edı̨ dene saánet’e gedéhtthı sı́ı dáondıh edı̨htł’éh megháádé eghálaeda la dene kehlı̨ gogha ǫt’e gots’ęh met’áh chu goxee názhagehtı̨ gha, ezhı́ı azhı́ı metah thelá la dáondıh gotah aget’ı̨ gha ǫt’e.

Edı̨ edı̨htł’éh nátse megháádé eghálaeda la met’áh yundah nezų gogha goɂǫ gha gots’ęh azhǫ amı́ı Yudáá Góhdlı Ndéh k’eh satsǫ́ ahsı́ı łǫ kenandı́h ts’ęhk’eh eghálagenda sı́ı met’áh nezų gots’aodı́h gha. Edı̨ ahsı́ı káondıh ts’ęhk’eh gots’endeh gha godezhı́ı, atł’áa duɂǫ yudáá Góhdlı Ndéh k’eh dene nıdháa nágadéh t’ah, ezhı́ı mets’ęhɂǫ dúhdzene dáondıh eghálaeda gots’ęh azhǫ gotah aget’ı̨ gha godezhı́ı. Edı̨ megháádé eghálaeda edı̨htł’éh la k’endah sǫ́ǫ geghǫıhndı́h gha, atł’áa dáondıh satsǫ́ ahsı́ı łǫ kenandı́h ts’ęhk’eh Yudáa Góhdlı Ndéh k’eh goxee eghálagenda gots’ęh k’endah zhee ts’ę́ gúlı́ı agogeléh gha.