ᐋᑐᕚ, 16 ᔭᓄᐊᕆ 2025
ᑭᒃᑯᑐᐃᓐᓇᕐᓄᑦ ᑎᑎᕋᖅᓯᒪᔪᖅ: 1011-NOC2025-0010
ᐃᓱᓕᕝᕕᑦᓴᖓ ᑐᓂᓯᓂᕐᒧᑦ ᐊᑲᐅᓂᖅᓴᒃᑰᕆᐊᖅᑎᑦᓯᓇᓱᐊᕐᓂᕐᒧᑦ: [18 ᕕᐅᓪᓗᐊᓕ 2025]
ᐃᓱᓕᕝᕕᒃᓴᖓ ᑐᓂᓯᓂᐊᕐᓗᓂ ᑭᐅᔾᔪᑎᓂᒃ: [28 ᕕᕗᐊᕆ 2025]
[ᑐᓂᓯᓂᖅ ᐊᑲᐅᓂᖅᓴᒃᑰᕆᐊᖅᑎᑦᑎᓇᓱᖕᓂᕐᒥᒃ ᕿᒥᕐᕈᓂᕐᓘᓐᓃᑦ ᐊᒃᑐᐊᓂᓕᖕᓂᑦ ᑎᑎᖅᑲᓂᑦ]
ᓇᐃᓈᖅᓯᒪᔪᖅ
ᐃᒥᐊᓗᓕᕆᔨᕐᔪᐊᒃᑯᑦ ᐃᑲᔪᓲᖑᕗᑦ ᐱᓕᕆᐊᖑᕐᔪᐊᖅᑐᓄᑦ ᑲᓇᑕᒥ, ᑲᓇᑕᒥ ᐊᕕᒃᑐᖅᓯᒪᔪᓂᒃ, ᐊᒻᒪ ᓄᓇᕘᒥ ᒐᕙᒪᓂᒃ ᖃᐅᔨᒪᔭᐅᖁᓪᓗᒋᑦ ᑕᑎᒋᔭᒃᓴᐅᔪᑦ, ᐊᑭᑐᓗᐊᙱᑦᑐᑦ, ᐊᒻᒪ ᐱᐅᑦᑎᐊᖅᑐᑦ ᑐᓴᐅᒪᔪᓕᕆᔾᔪᑎᓄᑦ ᐱᔨᑦᑎᕋᐅᑎᑦ ᐊᑐᐃᓐᓇᐅᓗᑎᒃ ᑲᓇᑕᒥᐅᓄᑦ ᑲᓇᑕᓕᒫᒥ. ᑕᒪᓐᓇ ᐱᓕᕆᐊᒃᓴᖅ ᐱᒻᒪᕆᐊᓘᕗᖅ ᐅᑭᐅᖅᑕᖅᑐᒥ, ᑕᒪᒃᑯᐊ ᐅᖓᓯᒌᒃᐸᖕᓂᖏᑦ ᓄᓇᓖᑦ, ᐃᓄᑭᓗᐊᕐᓂᖏᑦ, ᓄᓇᖓᓗ ᐊᔪᕐᓇᖅᑎᑦᑎᕗᖅ ᐊᑭᑐᓪᓗᓂᓗ ᐋᖅᑭᒃᓱᐃᓂᐊᕐᓗᓂ ᑲᔪᓯᑎᑦᑎᓂᐊᕐᓗᓂᓗ ᐅᖄᓚᐅᑎᒃᑯᑦ ᑐᓴᐅᒪᖃᑦᑕᐅᑎᖃᑎᒌᒃᐸᖕᓂᕐᒧᑦ ᐊᑐᖅᑕᐅᕙᒃᑐᓂᒃ. ᐊᑭᑐᓂᖏᑦ ᑐᓴᐅᒪᔾᔪᑎᓄᑦ ᐱᔨᑦᑎᕋᐅᑏᑦ ᐅᑭᐅᖅᑕᖅᑐᒥᑦ ᑐᑭᓕᐅᕆᓯᒪᔪᑦ ᐊᑭᑐᓂᖏᓐᓄᑦ ᓂᐅᕕᐊᒃᓴᑦ ᐊᑭᖏᑦ ᐊᔾᔨᒋᙱᖦᖢᓂᐅᒃ ᓇᒥᑐᐃᓐᓇᖅ ᑲᓇᑕᒥᑦ, ᖃᕆᑕᐅᔭᑦ ᐊᑭᑐᓗᐊᓕᖅᖢᑎᒃ ᐊᒥᓱᓄᑦ ᓄᓇᓕᖕᒥᐅᓄᑦ.
ᐊᑭᑐᓗᐊᙱᔾᔫᒥᖁᓪᓗᒋᑦ ᐅᑭᐅᖅᑕᖅᑐᒥ, ᐃᓅᓇᓱᐊᕐᓂᕐᒧᑦ ᐊᑭᖏᑦ ᐊᑭᑐᓂᖅᓴᐅᑎᓪᓗᒋᑦ ᐊᓯᖏᓐᓂᒃ ᑲᓇᑕᒥ, ᐃᒥᐊᓗᓕᕆᔨᕐᔪᐊᒃᑯᑦ ᐊᖏᖅᓯᓚᐅᖅᐳᑦ ᓴᖅᑭᑕᐅᔪᒥᒃ ᓂᐅᕕᐊᒃᓴᓄᑦ ᐃᑭᐊᖅᑭᕕᖕᒧᑦ ᐃᑲᔫᑎᒥᒃ Telecom−ᑯᑦ ᒪᓕᒐᖅᑎᒍᑦ ᐊᑐᐊᒐᖅ 2025-9−ᒥ. ᐃᓪᓗᖃᖅᑐᓕᒫᑦ ᐅᑭᐅᖅᑕᖅᑐᒥ ᐃᑲᔪᖅᑕᐅᒍᓐᓇᕐᓂᐊᖅᑐᑦ, ᖃᓄᐃᑦᑑᒐᓗᐊᖅᐸᑕ ᖃᕋᓴᐅᔭᒃᑯᑦ ᑐᔪᐃᔾᔪᑎᖏᑦ. ᐃᑲᔫᑎᐅᔪᖅ ᐃᑲᔫᑎᖃᑦᑎᐊᕐᓂᐊᖅᑐᖅ ᓄᓇᖃᑦᑎᐅᔪᓄᑦ ᐊᒻᒪᓗ ᐃᑲᔪᕐᓗᓂ ᒥᑭᓪᓕᑎᕆᓗᓂ ᐊᑭᖏᑕ ᐱᑕᖃᖏᓐᓂᖏᓐᓂᒃ ᖃᕋᓴᐅᔭᒃᑯᑦ ᑐᔪᐃᔾᔪᑎᒃᑯᑦ ᐊᑐᐃᓐᓇᐅᑎᑕᐅᔪᓂᒃ ᐊᕕᑦᑐᖅᓯᒪᔪᓂ ᐊᒻᒪᓗ ᓇᒥᑐᐃᓐᓇᖅ ᑲᓇᑕᒥ.
ᑲᑎᒪᔨᑦ ᓴᖅᑭᑦᑎᓂᐊᖅᑐᑦ ᐅᖃᐅᓯᒃᓴᓂᑦ ᖃᓄᖅ ᐱᐅᓛᒃᑯᑦ ᐊᑐᓕᖅᑎᑦᑎᔪᓐᓇᖕᒪᖔᖏᑦ ᐆᒥᖓ ᐊᑭᑭᒡᓕᒋᐊᕈᑖᓂᑦ. ᐱᑐᐃᓐᓇᐅᙱᑦᑐᑦ ᐃᓱᒪᒋᔭᒃᓴᐃᑦ ᐅᖃᐅᓯᒃᓴᓄᑦ ᓇᓗᓇᐃᔭᖅᓯᒪᕗᑦ ᐅᑯᓇᓂ, "ᐅᖃᐅᓯᒃᓴᓄᑦ" ᑎᑎᕋᖅᓯᒪᓂᖓᓂ ᑖᔅᓱᒪ ᑐᓴᖅᑎᑦᑎᔾᔪᑎᐅᑉ. ᑐᓴᖅᑕᐅᑎᑦᑎᔾᔪᑎᑦ ᖃᓄᖅ ᐃᓚᐅᖃᑕᐅᔪᓐᓇᕐᒪᖔᑦ ᑲᔪᓯᓂᕐᒥ ᓇᓂᔭᐅᔪᓐᓇᖅᑐᖅ ᐃᓱᐊᓂ ᑖᔅᓱᒪ ᖃᐅᔨᒃᑲᐃᔾᔪᑎᐅᑉ.